У Віцебску дзіця атрымала траўму ў секцыі па футболе. Яно ў рэанімацыі

У Віцебску падчас трэніроўкі пацярпеў навучэнец спецыялізаванай дзіцяча-юнацкай школы алімпійскага рэзерву «Камсамолец». Хлопчыка шпіталізавалі ў рэанімацыйнае аддзяленне бальніцы, паведамілі ў Мінздароўя.

Падрабязнасці інцыдэнту не паведамляюцца. Як адзначыла прэс-служба Мінспорту, траўму дзіця атрымала падчас заняткаў у паветраапорным манежы. Усе абставіны высвятляюцца.

«Пытанне знаходзіцца на асабістым кантролі міністра спорту і турызму Сяргея Кавальчука», — удакладнілі ў ведамстве.

У Мінздароўя дапоўнілі, што дзіця экстранна шпіталізавала брыгада хуткай медыцынскай дапамогі ў Віцебскую абласную клінічную бальніцу.

Хлопчык знаходзіцца ў аддзяленні рэанімацыі, стан цяжкі. Праводзіцца медыкаментознае лячэнне цяжкай чэрапна-мазгавой траўмы, удару галаўнога мозгу, пералому асновы чэрапа, удару грудной клеткі.

«Сёння вечарам у Віцебску пройдзе рэспубліканскі кансіліум з удзелам найбуйнейшых нейрахурургаў, спецыялістаў кафедраў неўралогіі і нейрахірургіі, анестэзіялогіі і рэанімацыі рэспубліканскага ўзроўню. Будзе разгледжанае пытанне пра выкарыстанне разнастайных сучасных методык лячэння віцебскага школьніка», — дадалі ў Мінздароўя.