Стала вядома, хто здзейсніў маштабную кібератаку на X. Маск сцвярджаў, што сляды вядуць ва Украіну

11 сакавiка 2025 у 1741681320
Вера Караўская / «Зеркало»

Адказнасць за маштабную кібератаку на Х узяла на сябе прапалестынская хакерская групоўка Dark Storm Team, паведамляе Newsweek. Раней уладальнік сацсеткі Ілан Маск сцвярджаў, што да гэтага датычныя IP-адрасы, размешчаныя ва Украіне.

Прапалестынская хакерская групоўка Dark Storm Team узяла на сябе адказнасць за кібератаку на Х, абвясціўшы пра гэта ў сацсетках. Яна вядомая тым, што ў першую чаргу нацэльваецца на краіны і арганізацыі, якія падтрымліваюць аперацыю Ізраіля ў сектары Газа пасля нападу ХАМАС 7 кастрычніка 2023 года.

Як сцвярджае Orange Cyberdefense, у Dark Storm Team ёсць непацверджаныя, але «вельмі імаверныя» сувязі з Расіяй і «цесныя партнёрскія адносіны з іншымі групоўкамі».

Нагадаем, 10 сакавіка Ілан Маск заявіў, што сацсетка Х, якая належыць яму, зазнала маштабную кібератаку.

«На X была здзейсненая (і дагэтуль доўжыцца) маштабная кібератака», - напісаў ён.

Маск адзначыў, што атака была праведзеная з дапамогай вялікай колькасці рэсурсаў.

«У ёй удзельнічае альбо вялікая скаардынаваная група, альбо краіна», - падкрэсліў бізнесовец.

Пры гэтым у эфіры Fox News бізнесовец заявіў, што сацсетка была атакаваная з украінскіх IP-адрасоў.

«Мы не ведаем дакладна, што адбылося, але была здзейсненая масіраваная кібератака з мэтай вывесці з ладу сістэму X з IP-адрасоў, размешчаных ва Украіне», - заявіў мільярдэр.

Эксперт па кіберперацыях Нікалас Рыз у каментары Star Tribune выказаў сумнеў з нагоды версіі пра датычнасць якой-кольвек дзяржавы да атакі, адзначыўшы кароткачасовасць збояў. Ён таксама адзначыў, што каштоўнасць, якую хакеры маглі б атрымаць ад такой атакі, вельмі нізкая.