Страсянуць ВНУ даручыў Аляксандр Лукашэнка на нарадзе з кіраўнікамі вышэйшых навучальных установаў краіны 13 лютага, паведамляе прэс-служба палітыка.
На мерапрыемстве Лукашэнка падкрэсліў, што «вострым пытанням адукацыі» прысвяцілі амаль год.
— Прынялі канчатковыя рашэнні па арганізацыі ўступнай кампаніі ў ВНУ, разабраліся са школьнай адукацыяй. У гэтай тэме паставілі кропку. Цяпер дашліфоўвайце падыходы. Сёння стаіць задача — страсянуць ВНУ. Да 1 верасня рэктары павінныя прыняць неабходныя рашэнні. Як вынік — якасныя выпускнікі і адсутнасць усякіх уцёкаў за межы краіны, — сказаў Лукашэнка.
Палітык адзначыў, што на рынку працы існуе разрыў паміж попытам і прапановай, нагадаў, «як у 90-я пачалі рыхтаваць натоўпы юрыстаў, эканамістаў, якія, атрымаўшы дыплом, пайшлі працаваць таксістамі і разносчыкамі піцы».
— Ды і цяпер пасля заканчэння ВНУ многія выпускнікі працуюць не па профілі, — заўважыў Лукашэнка, дадаўшы, што неаднаразова звяртаў увагу на гэтую тэму. — Падрыхтоўка няпрофільных спецыялістаў, нізкая замацоўвальнасць на першым працоўным месцы, адыход з прафесіі — гэта недазваляльная раскоша для нашай дзяржавы. Што, нам грошы няма куды падзець? А калі ўлічыць, колькі дзяржава плаціць, то што гэта, калі не эканамічнае злачынства?
Палітык заявіў, што ВНУ — гэта не камерцыйныя структуры:
— Вы рэктары ВНУ і думаць абавязаныя па-дзяржаўнаму. У першую чаргу вы мусіце рыхтаваць кадры пад запатрабаванні айчыннага рэальнага сектара. Пакуль сістэмнай працы Мінэканомікі, Мінпрацы і Мінадукацыі, ды і губернатараў у гэтым пытанні не відаць.
Таксама Лукашэнка абурыўся імкненнем выпускнікоў атрымаць вышэйшую адукацыю за мяжой:
— Гэта што за мода? Ці аб’ектыўны выбар? Гэта будучая эліта дзяржавы. Нашай дзяржавы. Як вы за іх змагаецеся? Канкрэтнае пытанне, на якое я хацеў бы пачуць канкрэтны адказ. Вядома, яны могуць вярнуцца, але з цалкам перакручанай свядомасцю. І чаму БДУ, БНТУ, медыцынскія ўніверсітэты або БДУІР не з’яўляюцца для нашых вундэркіндаў прыярытэтам для паступлення?
На нарадзе Лукашэнка падняў тэму і якасці вышэйшай адукацыі. Паводле яго звестак, «ледзь не палова студэнтаў» сёння незадаволеная ўзроўнем атрыманых ведаў.
— Дакладваюць, вы не паспяваеце за тэхналогіямі, маладыя спецыялісты давучваюцца на вытворчасці. А мы ж патрабуем у заказчыка гарантаваць першае працоўнае месца. Каму патрэбныя такія «спецыялісты»? Але калі спецыялісты не адпавядаюць запытам заказчыкаў, то дзе іх удзел у працэсе навучання? Чаму вытворцы самі не ідуць у аўдыторыі? Пытанні ўсім: рэктарам, галіновым міністэрствам, ураду, — сказаў Лукашэнка.
Палітык прапанаваў стварыць працоўную групу «як у ахове здароўя» і праверыць ВНУ.
— Закасцянелі да неймавернасці, — панаракаў Лукашэнка.