У педыятрычным аддзяленні Жыткавіцкай раённай бальніцы 27 жніўня памерла дзяўчынка, якой быў усяго месяц. Пра гэта журналістам расказала мама малой Саманта. Гэта было яе першае дзіця.
У Саманты гэта было першае дзіця. Маладая жанчына родам з Талачына. У Жыткавічы, дзе адбылася трагедыя, пераехала пасля замужжа. Месяц таму яна нарадзіла дачку ў Гомельскім абласным радзільным доме. Дзяўчынка, кажа маці, адчувала сябе добра.
Раніцай 26 жніўня Саманта павезла дзяўчынку ў мясцовую паліклініку на планавы агляд педыятра. Але, кажа, паказаць дзіця доктары так і не ўдалося: усе былі ў адпачынках.
— Мы вярнуліся дадому, і гадзін да дзвюх з Раянай усё было добра (маці і дзіця — прадстаўнікі этнічнай групы цыган, адсюль такія незвычайныя імёны. — Заўв. рэд.). А пасля я заўважыла, што ў малой паднялася тэмпература, памерала: было 38. Мне стала трывожна, і я выклікала хуткую: не ведала, як наогул збіваць тэмпературу ў такіх маленькіх. Лішні раз баішся дакрануцца, а тут такое! Прыехаў фельчар, агледзеў, зрабіў укол, збіў тэмпературу і параіў ехаць у бальніцу. «Бо тэмпература, бо будзе лепш, калі такое маленькае дзіця будзе пад наглядам дактароў», — тлумачыў ён мне. Я хутка сабрала рэчы і паехала.
У прыёмны пакой Жыткавіцкай раённай бальніцы Раяна паступіла каля 16 гадзін таго ж дня. У малой узялі аналізы крыві, пазней яе агледзеў доктар.
— Потым нас з дачкой змясцілі ў палату. Прыйшла доктарка, паслухала яе, прызначыла лячэнне. Бліжэй да вечара, гадзін у сем, малая стала неспакойнай, пачала плакаць, я паклікала медсястру, папрасіла яе памераць тэмпературу. Тэрмометр паказаў 37 градусаў, медсястра прынесла ў шпрыцы лекі (гарачкапаніжальнае. — Заўв. рэд.) і сказала уліць у рот малой. Я ўліла. Медсястра была побач. Дзяўчынка супакоілася і заснула на нейкі час. Спала ўрыўкамі, а бліжэй да трох гадзін ночы ў яе пачалася істэрыка.
У гэты момант Саманта заўважыла на твары ў дачкі нейкія прышчыкі і паклікала медсястру. Калі тая неўзабаве падышла, дзіцяці стала прыкметна горш. Дзяўчынцы зноў далі лекі. Як кажа маці — ад алергіі. Але малой нічога не дапамагала. Пазней, расказала журналістам Саманта, прыехаў педыятр, сабраўся кансіліум.
— Сказалі, што гэта не алергія, што гэта інфекцыя, назвалі нейкую хваробу, але я не запомніла. Дачку забралі ў рэанімацыю, а раніцай паведамілі, што яе больш няма. Цела яе нам аддалі не адразу: як я зразумела, яе забіралі на ўскрыццё ў Гомель.
У медычным пасведчанні пра смерць у якасці непасрэднай прычыны смерці стаіць вірусная інфекцыя неўдакладненай этыялогіі.
— Сёння я напісала заяву ў СК (Жыткавіцкі раённы аддзел Следчага камітэта. — Заўв. рэд.), хачу, каб ацанілі дапамогу, аказаную маёй дачцэ.
А што кажуць у бальніцы?
У тэлефоннай размове з журналістам медработнік Жыткавіцкай раённай бальніцы пацвердзіў смерць дзяўчынкі раніцай 27 жніўня і дадаў, што медперсанал са свайго боку зрабіў усё магчымае, каб яе выратаваць.