Партугальскі форвард выказаўся з нагоды пераходу ў мадрыдскі «Рэал» француза Кіліяна Мбапэ. Гэты каментар стаў самым папулярным у гісторыі сацыяльных сетак, піша The Daily Mail.
Пра пераход Мбапэ на правах вольнага агента ў «Рэал» афіцыйна абвясцілі ўвечары 3 чэрвеня. Футбаліст, які раней выступаў за ПСЖ, апублікаваў пост у Instagram, у якім заявіў, што гуляць у «Рэале» — ажыццяўленне яго мары.
Да пятніцы, 7 чэрвеня, гэты пост набраў больш за 23 млн лайкаў і 768 тысяч каментароў. Адзін з іх пакінуў экс-футбаліст «Рэала» Крышціяну Раналду:
— Мая чарга глядзець. Мне не цярпіцца ўбачыць, як ты асвятляеш «Бернабеу» (хатні стадыён «Рэала». — Заўв. рэд.).
Гэты каментар стаў самым папулярным у гісторыі сацыяльных сетак. На раніцу 7 чэрвеня ў яго ўжо больш за 5 млн лайкаў. Ён значна перасягнуў папярэдняе дасягненне.
13-гадовы падлетак Рыд Харынгтан у 2023-м запісаў відэа і паабяцаў, што калі ў яго будзе 200 000 падпісчыкаў, то ён зробіць чэлендж, агучаны ў самым папулярным каментары пад відэа.
Харынгтану кінулі незвычайны выклік. Каментар, які сабраў 3,62 млн лайкаў, быў такім: «Прыляцець у маленькі гарадок у Тайландзе, быць прынятым яго людзьмі, вывучыць мову, займацца тайскім боксам паўтара года, пазмагацца на турніры, выйграць турнір, вярнуцца ў ЗША і заявіцца ў UFC, быць у форме і заставацца непераможаным у сваёй вагавай катэгорыі, пакінуць спорт і даць інтэрв'ю, сказаўшы, што гэты каментар стаў прычынай таго, што ты так упарта змагаўся…»
Юнак, у якога ўжо 575 тысяч фолавераў, цяпер рэгулярна выкладвае відэа, як ён займаецца тайскім боксам. А ў траўні гэтага года Рыд атрымаў візу ў Тайланд.
