Беларус Дзмітрый Шэпелеў страціў працу на тэлеканале «Россия», дзе ён вёў штотыднёвае шоу «В кругу друзей», паведаміла «Комсомольская правда».
Падчас перадачы 41-гадовы вядоўца гутарыў з расійскімі зоркамі і тэлегледачамі, якія прыходзілі на эфіры са сваімі хатнімі гадаванцамі.
Мяркуючы з тэлепаказаў, у кастрычніку 2024 года Шэпелеў страціў месца вядоўцы «В кругу друзей». Новыя выпускі вядзе актор Сяргей Друзьяк.
Акрамя тэлебачання ва ўраджэнца Мінска не складваецца і з падкастамі на радыё і ў сеціве. Першы быў прысвечаны штучнаму інтэлекту, другі — «Папа дома». Аднак абодва праекты Шэпелева не абнаўляліся з пачатку лета.
Нядоўгая гісторыя была і ў праекта «Свидание с прицепом» на Rutube, які выйшаў вясной 2024-га: пасля некалькіх выпускаў яго прыпынілі. Дзмітрый Шэпелеў быў вядоўцам і прадзюсарам шоу.
Нагадаем, Шэпелеў доўгі час працаваў на тэлеканалах і зрабіў сабе імя менавіта ва Украіне. У першы дзень поўнамаштабнага расійскага ўварвання ён апублікаваў антываенны допіс.
«Мне асабліва страшна ад таго, што я цяпер адвёз дзіця ў школу, а мае сябры ў Кіеве і іншых гарадах Украіны вядуць дзяцей у бамбасховішчы. Гэта не ўкладваецца ў галаве», — напісаў Дзмітрый 24 лютага 2022 года.
Яго запрашэнне на цэнтральны расійскі тэлеканал выклікала хвалю крытыкі. У прыватнасці, запрашэннем Шэпелева абурылася першая намесніца старшыні камітэта Дзярждумы РФ па культуры Алена Драпека. Акторка Яна Паплаўская (сыграла Чырвонага Каптурка ў знакамітым савецкім фільме «Пра Чырвоны Каптурок» беларускага кінарэжысёра Леаніда Нячаева) заявіла, што будзе дамагацца звальнення Шэпелева, назваўшы яго «ворагам унутры Расіі».
У верасні 2023 года Шэпелеў з’ездзіў у разбураны і акупаваны Расіяй украінскі горад Марыупаль.