Сектар IT-тэхналогій у Беларусі не абрынуўся пасля ад’езду айцішнікаў, а наадварот, «рухаецца наперад», заявіў Аляксандр Лукашэнка на сустрэчы з беларускімі навукоўцамі 9 лютага.
Лукашэнка прызнаў, што «пэўныя людзі пабеглі за мяжу».
— Я іх не асуджаю. Таму што амерыканцы і іншыя білі па IT-сектары, каб нас прытармазіць, увялі санкцыі. Ну куды ім дзявацца? Хтосьці выехаў, хтосьці вярнуўся, — адзначыў Лукашэнка. — Хтосьці паездзіў па свеце [і вырашыў] - не, толькі ў Беларусь. У беларусаў гэта асаблівасць: мала хто можа быць за мяжой і быць задаволеным. (…) Вось з’ехалі — ну не абрынуўся ж IT-сектар у эканоміцы, прамысловасці, сельскай гаспадарцы. Наадварот — рухаецца. Тыя, хто з’ехаў… Іх месца займаюць іншыя.
Аляксандр Лукашэнка таксама ўпэўнены, што IT-тэхналогіі «добра развітыя на многіх буйных айчынных прадпрыемствах, у Акадэміі навук».
Насуперак заявам уладаў пра вяртанне рэлакантаў з беларускага IT-сектара, адток спецыялістаў, наадварот, узмацніўся, адзначаў у лютым 2023 года devby.io.
Усяго за мінулы год беларускія IT-кампаніі працаўладкавалі крыху больш за 13 тысяч новых супрацоўнікаў — на 34% менш, чым за 2021 год.
З IT-кампаній за мінулы год звольнілася больш за 29,5 тыс. спецыялістаў — на 74% больш, чым у 2021 годзе.
Агулам IT-кампаніі звольнілі за год у 2,2 разу больш супрацоўнікаў, чым узялі на працу. Усяго за 2022 год IT-сектар страціў больш за 16,5 тыс. спецыялістаў.
Адток айцішнікаў пацвярджаецца і іншымі звесткамі афіцыйнай статыстыкі. У прыватнасці, змяненнем сярэдняспісачнай колькасці супрацоўнікаў па розных галінах. Гэта колькасць работнікаў, якія былі ў кампаніях ў названыя перыяды, паводле звестак Белстата. Памеры кампаній, якія ўключаныя ў статыстыку па агульнай колькасці персаналу, невядомыя.
У беларускім IT у студзені 2022 сярэдняспісачная колькасць была 53,7 тысячы, але ўжо ў снежні 2022 — 41,9 тысячы (мінус 22%).
