14 дзён улады хаваюць любую інфармацыю пра месцазнаходжанне і стан здароўя Віктара Бабарыкі. Татальная — і відавочна наўмысная — цішыня. У Дэпартаменце выканання пакаранняў МУС адмаўляюцца гаварыць з блізкімі палітыка. Заклік Еўрасаюза дапусціць да палітыка людзей ігнаруецца. Адна з нешматлікіх заяваў афіцыйных асобаў пра тое, што адбываецца — адказ амбасады Беларусі ў Эстоніі амбасадару ЗША пры АБСЕ, у якім яны чамусьці загаварылі пра Лукашэнку. За гэты час назапасілася шмат важных пытанняў, на якія беларускім уладам варта адказаць. Вось яны.
Дзе Віктар Бабарыка?
Апошні раз беларускае грамадства дакладна ведала, дзе палітык, 27 красавіка, калі ў Наваполацкай цэнтральнай гарадской бальніцы пацвердзілі, што ён знаходзіцца ў іх. Аднак ужо назаўтра яго месцазнаходжанне аказалася невядомым, і толькі 29 красавіка прадстаўнік адміністрацыі калоніі заявіў толькі, што Бабарыка «жывы і здаровы» і працягвае адбываць пакаранне. Пры гэтым дзе менавіта знаходзіцца экс-банкір, афіцыйныя асобы не паведамляюць дагэтуль.
Што са здароўем палітыка і як ён апынуўся ў бальніцы?
Дакладна не вядома, чаму Бабарыка апынуўся ў бальніцы і што з ім там адбывалася. «Рабочы Рух» паведамляў, што экс-банкір быў моцна збіты і ў яго выявілі пнеўматоракс. Выданне «Позірк» са спасылкай на сваю крыніцу расказвала, што палітыка абследавалі і выявілі вадкасць у лёгкіх.
Штаб Бабарыкі змог даведацца толькі тое, што 27 красавіка ў канцы дня палітвязеньзнаходзіўся ў хірургічным аддзяленні ў стане сярэдняй цяжкасці.
З таго часу ўжо два тыдні пра здароўе палітыка грамадства нічога не ведае. Адсутнасць дакладнай інфармацыі нараджае яшчэ больш канспіралагічных тэорый і чутак пра стан Віктара Бабарыкі.
Чаму, калі Бабарыка «жывы і здаровы», яго не паказваюць блізкім і грамадству, як гэта зрабілі з Марыяй Калеснікавай?
Гісторыя з Віктарам Бабарыкам — не першы прыклад, калі ўлады хаваюць інфармацыю пра стан здароўя вядомых палітвязняў. У канцы лістапада 2022 года ў падобнай сітуацыі аказалася Марыя Калеснікава, якую шпіталізавалі ў БХМП Гомеля. Афіцыйна дыягназ улады не пацвярджалі да 5 снежня — тады яны заявілі, што ў яе была прабадная язва. Гэта супадала з інфармацыяй, якую за тыдзень да гэтага атрымалі журналісты. Ні адвакату, ні бацьку палітзняволенай увесь гэты час не паведамлялі дыягназ Марыі.
Бацька Марыі, Аляксандр Калеснікаў, змог убачыць дачку праз 7 дзён: ім урэшцедазволілі 10-хвіліннае спатканне. Пасля гэтай сустрэчы ў праўладных тэлеграм-каналах з’явіўся скрыншот відэа з палаты Марыі, на якім беларусы змаглі ўбачыць усмешлівую палітзняволеную. Дык чаму блізкім Віктара Бабарыкі, які «жывы і здаровы», і грамадству не пакажуць палітыка ці кадры з ім?
Чаму ўлады ўпарта маўчаць? Вам ёсць што хаваць?
Чаму, нягледзячы на запыт ад грамадства і заклікі беларускіх і заходніх палітыкаў, улады не кажуць ні слова пра сітуацыю з Віктарам Бабарыкам?
На пляцоўках «Люстэрка» з 27 красавіка матэрыялы пра палітыка прагледзелі каля 3 млн разоў — цікавасць да таго, што адбываецца з экс-банкірам, велізарная.
Вядомы адвакат Дзмітрый Лаеўскі тлумачыў, што пракуратура Наваполацка павіннаяпачаць праверку па сітуацыі з Бабарыкам. Калі 5 траўня нашая журналістка патэлефанавала туды як звычайная грамадзянка, намесніца пракурора Алена Коласава заявіла нам, што мы «не маем права задаваць такія пытанні». Беларусы не маюць права ведаць, што адбываецца з адным з найпапулярнейшых палітыкаў краіны.
Мы ўпэўненыя, што людзі, у якіх ёсць адказы на нашыя пытанні, прачытаюць гэты тэкст. Сваім маўчаннем вы нараджаеце ў галовах найгоршыя сцэнары — аж да таго, што Віктара Бабарыкі больш няма ў жывых. У інтарэсах беларусаў і Беларусі раскрыццё інфармацыі пра тое, што цяпер адбываецца з палітыкам. Мы заклікаем вас расказаць грамадству праўду. І зрабіць гэта проста цяпер.
