Раскрыем вам сакрэт. Журналісты незалежных медыя пра гэта ведаюць, а вось вы, мабыць, не. Час ад часу для стварэння тэксту нам трэба высветліць, да якога (дзіўна прагучыць) віду экстрэмізму адносіцца тая ці іншая рэдакцыя: проста матэрыялы, матэрыялы і фарміраванне, а можа, наогул арганізацыя. І ў нейкі момант мы пачалі забываць правільныя адказы на гэтыя пытанні. Не таму, што ў нас праблемы з памяццю, а таму, што гэтыя статусы выдаюцца бессістэмна, і трымаць усё гэта ў галаве проста немагчыма. Цяпер мы ідзём на сайт МУС, загружаем патрэбныя дакументы і правяраем. Гэта вельмі вялікія файлы. Напрыклад, у дакуменце з пералікам экстрэмісцкіх матэрыялаў амаль 77 500 словаў — для параўнання, у «Дзікім паляванні караля Стаха» Караткевіча іх каля 58 000. Фарміраванняў менш — 135 штук. Менавіта 135-ы нумар, апошні на гэты момант, цяпер прысвоены «Люстэрку». І вось навошта ўлады гэта робяць.
Раней толькі матэрыялы «Люстэрка» былі экстрэмісцкімі, цяпер нас прызналі яшчэ і экстрэмісцкім фарміраваннем. У чым розніца, мы дэталёва расказалі тут, у гэтым жа тэксце нам хочацца звярнуцца да вас і пастарацца растлумачыць, чаму ўсё гэта адбываецца.
Ведаеце, які адзін з галоўных страхаў рэжыму? Калі людзі не ламаюцца, калі адмаўляюцца падпарадкоўвацца волі таго, хто мучыць іх з дня ў дзень. І менавіта таму ўлады хочуць нас з вамі разлучыць — каб усе мы адчувалі сябе сам-насам са сваімі праблемамі і не ведалі, што нас, увогуле, мільёны. Людзей, якія хочуць лепшага для Беларусі і не закрываюць вочы на ўвесь той жах, які адбываецца вакол.
І такіх беларусаў вельмі шмат. За мінулы месяц толькі на сайце вы прачыталі нашыя навіны каля 40 мільёнаў разоў. Вы не адны. І мы не адны.
Рэжым надае нам новыя статусы, пагражае тэрмінамі журналістам і аўдыторыі. І ўсё гэта для таго, каб мы з вамі страцілі адно аднаго: вы перасталі чытаць і глядзець сапраўдныя навіны, а мы страцілі надзею і сышлі з прафесіі, бо працаваць нам быццам няма для каго. І тады ўлады будуць па-сапраўднаму шчаслівыя, бо ніхто не раскажа пра іх злачынствы, і, такім чынам, яны змогуць працягваць гэта рабіць ужо зусім без аглядкі на грамадства і сваю будучыню.
Але мы ведаем, што гэтага не будзе. Таму што вы, кожны чытач і глядач «Люстэрка», — вельмі смелыя людзі. Нягледзячы на страх, боль, стомленасць, вы працягваеце чытаць і глядзець нас на розных платформах. Бо вы не хочаце, каб нашая краіна пагрузілася ў абсалютную цемру, вы не хочаце, каб хлусня стала ісцінай.
Мы вамі ганарымся. Вы — нашае святло, якое дапамагае нам знаходзіць у сабе сілы кожны дзень, прадзіраючыся скрозь людскі боль і разбураныя лёсы, працягваць расказваць сапраўдныя навіны.
Дзякуй, што вы з намі. Мы вас не падвядзём.
Чытайце таксама
