Краіны калектыўнага Захаду мусяць зразумець, што Беларусь і Расія сапраўды гатовыя ў выпадку неабходнасці выкарыстаць ядзерную зброю. Такое меркаванне ў эфіры праграмы «Аб'ектыўна» на АНТ выказаў генеральны сакратар Беларускага таварыства Чырвонага Крыжа Дзмітрый Шаўцоў.
«Вядома, тая палітыка, якая была ў Савецкім Саюзе, яна выклікала шмат спрэчак, шмат пагалосак. Але ўчынак Мікіты Хрушчова, які раптоўна прывёз на Кубу ядзерную зброю, паставіў, па-першае, безумоўна, на мяжу ядзернай вайны ўсё чалавецтва. Але выразна паказаў усім сваё месца. І выразна паказаў, што Савецкі Саюз проста так у бірулькі, прабачце, не гуляе. Калі трэба — будзе выкарыстаная тактычная ядзерная зброя. І тады, прабачце, некаторыя людзі з аднаго кантынента селі на сваю дупу і зразумелі, што далей ужо сапраўды нельга. Тут мы больш уключаем палітычныя спрэчкі, мы шукаем сляды Амерыкі, Англіі, Еўропы ў тым, што адбываецца. Хоць што яшчэ шукаць? Напэўна, нават калі напішуць пісьмова „так, гэта мы“, усё роўна расійскія спецыялісты будуць правяраць. Для чаго гэта трэба? Я ні да чога не заклікаю. Я досыць просталінейны чалавек, часам пакутую за гэта. Але рэчы трэба называць сваімі імёнамі. Можа быць, усё ж варта людзям намякнуць, што мы не проста вам гаворым і папярэджваем, а мы гэта канкрэтна можам зрабіць», — заявіў Шаўцоў.
Нагадаем, генеральны сакратар БТЧК апошнім часам як мінімум двойчы наведваў акупаваныя рэгіёны Украіны. Падчас першай паездкі ён раздаваў каментары расійскаму дзяржвыданню «Sputnik Беларусь», стоячы ў камуфляжы і з літарай Z на рукаве, хоць статут Чырвонага Крыжа патрабуе ад сябраў арганізацыі заставацца нейтральнымі.
У другі свой візіт на Данбас Шаўцоў у майцы і кепцы з лагатыпамі Чырвонага Крыжа перадаваў гуманітарную дапамогу. Тады ён адкрыта пацвердзіў, што арганізацыя ўдзельнічае ў вывазе дзяцей з Украіны ў Беларусь.
— Мяне да глыбіні душы абурыў той факт, што людзі, думаю, у меру сваіх думак хворых, ці яны лічаць, што так лагічна рабіць — калі абвінавацілі Беларусь у тым, што мы выкрадаем дзяцей, якія прыязджаюць да нас на аздараўленне. І, шчыра кажучы, рэч у тым, што і беларускі Чырвоны Крыж браў у гэтым — і бярэ, і будзе браць — актыўны ўдзел, — сказаў Шаўцоў.
Міжнародны Чырвоны Крыж асудзіў паездку генеральнага сакратара беларускага таварыства Шаўцова ў акупаваныя рэгіёны Украіны, а кіраўнік МЗС Украіны заклікаў Міжнародны суд выдаць ордар на яго арышт.