На электронным аўкцыёне «БелЮрЗабяспечанне» выставілі на таргі нерухомасць Валерыя Цапкалы — трохпакаёвую кватэру з машына-месцам у Мінску.
Трохпакаёўка знаходзіцца на восьмым паверсе ў доме № 5 на вуліцы Чарнышэўскага, гэта недалёка ад станцый метро «Акадэмія навук» і «Парк Чалюскінцаў». Агульная плошча жылля — 103,7 м2. У кватэры зарэгістраваны адзін чалавек.
Паведамляецца, што ў кватэры ёсць убудаваныя шафы, кандыцыянер, кухонны гарнітур, выцяжка, варачная панэль.
Разам з жыллём прадаецца паркавальнае месца на падземнай аўтастаянцы.
Даўжніком называецца Цапкала Валерый Вільямавіч. Адзначаныя абцяжаранні: арышт следчых органаў, забарона рэгістрацыйных дзеянняў рэгістравальнага органа, судовага выканаўцы.
Пачатковы кошт маёмасці — 358 442 рублі 20 капеек. Аўкцыён мае адбыцца 27 лютага.
Нагадаем, Валерый Цапкала ў мінулым кіраваў беларускім Паркам высокіх тэхналогій. Для ўдзелу ў прэзідэнцкай кампаніі 2020 года ён сабраў ініцыятыўную групу, ездзіў па краіне. Аднак ЦВК адмовіў яму ў рэгістрацыі праз тое, што сабраных подпісаў пасля праверкі аказалася менш за сто тысяч. Калі палітыка не дапусцілі да ўдзелу ў выбарах, яго жонка Вераніка далучылася да аб’яднанага штабу Святланы Ціханоўскай.
Валерый Цапкала пакінуў краіну ў ліпені 2020 года, асцерагаючыся пераследу. 9 жніўня з Беларусі з’ехала і Вераніка. Сям’я Цапкалаў асталявалася ў Латвіі.
На радзіме Валерыя Цапкалу завочна асудзілі на 17 гадоў калоніі ўзмоцненага рэжыму.
Чытайце таксама
