У Беларусі ў 2025 годзе адменяць ільготу па падаходным падатку на даходы, якія фізічныя асобы атрымліваюць ад продажу доляў у статутным фондзе беларускіх арганізацый і іх акцый. Новаўвядзенне прадугледжваецца праўкамі ў Падатковы кодэкс.
Цяпер гэтыя даходы вызваляюць ад падаходнага збору. Пры гэтым па набытых з 1 студзеня 2014 года акцыях ёсць умова, каб не плаціць падатак падчас іх продажу: чалавек мусіць валодаць імі бесперапынна не менш за тры гады (гэта прапісана ў пункце 35 артыкула 208 Падатковага кодэкса).
Як тлумачыў раней першы намеснік міністра фінансаў Дзмітрый Кійко, асноўная прычына скасавання гэтай ільготы ў тым, што «прыкметнага эфекту для інвестыцый не адзначаецца, бо сродкі фактычна не рэінвестуюцца, а размяркоўваюцца на карысць фізічных асоб у павышаных памерах». Паводле яго, гэтае новаўвядзенне не закранае інтарэсаў дзяржарганізацый, бо яны ў абавязковым парадку размяркоўваюць частку прыбытку.
Нагадаем, у 2025 годзе ўвядуць і іншыя падатковыя новаўвядзенні. Да прыкладу, будзе павышэнне ставак збораў, якія вызначаныя ў рублях. Гэта сярод іншага маёмасныя падаткі — на зямлю, нерухомасць, транспарт.
