У Мінскім абласным судзе 5 снежня вынеслі прысуд пяцярым абвінавачаным па справе «Атрадаў грамадзянскай самаабароны Беларусі». Ім інкрымінавалі спробу падарваць вузел сувязі ў Вілейцы, знішчыць лесанарыхтоўчую тэхніку ў лясгасах і здзейсніць замах на прапагандыста Рыгора Азаронка. Як і прасіла абвінавачанне, фігурантаў асудзілі на пазбаўленне волі на тэрмін ад 14 да 20 гадоў, паведамляе праваабарончы цэнтр «Вясна».
Абвінавачаным вынеслі прысуды:
- Наталлі Мацвеевай (абвінавачвалася па ч. 2 арт. 290−4, ч. 1 арт. 13 і ч. 2 арт. 289, ч. 2 арт. 295−3 КК) — 14 гадоў калоніі і штраф у 400 базавых адзінак (12 800 рублёў);
- Вадзіму Гулевічу (ч. 2 арт. 290−4, ч. 2 арт. 289, ч. 1 арт. 290−2, ч. 1 арт. 13 і арт. 290−3, ч. 4 арт. 295 КК) — 18 гадоў калоніі і штраф 600 базавых адзінак (19 200 рублёў);
- Кірылу Ашурку (ч. 2 арт. 290−4, ч. 6 арт. 16 і ч. 2 арт. 289 КК) — 15 гадоў калоніі і штраф у 400 базавых велічынь (12 800 рублёў);
- Аляксею Глотаву (ч. 2 арт. 290−4, ч. 2 арт. 289, ч. 1 арт. 13 і ч. 1 арт. 359, ч. 1 арт. 14 і ч. 2 арт. 295, ч. 4 арт. 295 КК) — 20 гадоў калоніі і штраф 700 базавых адзінак (22 400 рублёў);
- Дзмітрыю Сасноўскаму (ч. 1 арт. 361−1, ч. 2 арт. 290−4, ч. 1 арт. 13 і ч. 1 арт. 359, ч. 6 арт. 16, ч. 1 арт. 13 і ч. 2 арт. 295, ч. 1 арт. 14 і ч. 4 арт. 295, ч. 3 арт. 361, ч. 1 арт. 130 КК) — 20 гадоў калоніі і штраф 700 базавых адзінак (22 400 рублёў).
Менавіта такія тэрміны прасіў для іх пракурор.
Нагадаем, Вадзім Гулевіч, Кірыл Ашурак і Аляксей Глотаў былі затрыманыя па справе аб падрыве вузла сувязі ў Вілейцы, Наталля Мацвеева — па справе аб спробе знішчыць лесанарыхтоўчую тэхніку ў лясгасах, Дзмітрый Сасноўскі — па справе аб замаху на работніка тэлеканала СТБ Рыгора Азаронка.
Усе яны ўнесеныя ў «пералік арганізацый і фізічных асобаў, якія маюць дачыненне да тэрарыстычнай дзейнасці» КДБ.
— Выяўлена, што названая супольнасць была створаная ў верасні 2020 года з мэтай ажыццяўлення супрацьпраўнай дзейнасці і аб’ядноўвала радыкальна настроеных грамадзян для гвалтоўнай змены дзяржаўнай улады, — паведаміў начальнік упраўлення Генпракуратуры Сяргей Абрамовіч. — Кіраўнікі і ўдзельнікі арганізацыі не толькі абмяркоўвалі, але і прыступілі да здзяйснення актаў тэрарызму на тэрыторыі Беларусі для дэстабілізацыі грамадскага парадку, аказання ўздзеяння на прыняцце рашэнняў органамі ўлады.
У жніўні 2021 года «АГСБ» былі прызнаныя тэрарыстычнай арганізацыяй.
