Беларускі добраахвотнік Эдуард Лобаў загінуў 26 студзеня ў баях пад украінскім Вуглядарам. Пра гэта паведаміла «Радыё Свабода» са спасылкай на некалькі ананімных крыніц.
Са словаў калегі Эдуарда, Лобаў з пераносным супрацьтанкавым ракетным комплексам «Джавелін» «паляваў» на танкі, але ўступіў у блізкі бой і атрымаў аскепкавае раненне, ад якога неўзабаве памёр.
Эдуард служыў у 72-й асобнай механізаванай брыгадзе. Удзельнічаў у вызваленні Кіеўскай вобласці і Чарнобыля. Апошнія некалькі месяцаў ён быў пад Вуглядарам. Эдуарду было 34 гады.
Лобаў — былы беларускі палітвязень. Ён адседзеў амаль чатыры гады пасля прэзідэнцкіх выбараў 2010 года.
Гібель беларуса пракаментавала лідарка дэмакратычнай Беларусі Святлана Ціханоўская:
«Сёння стала вядома, што ва Украіне на вайне загінуў беларускі добраахвотнік Эдуард Лобаў. Ён быў сапраўды выбітным беларусам, які абараняў Беларусь — і дзяржава „ўзнагародзіла“ яго за гэта статусам палітзняволенага яшчэ ў 2010 годзе. Ён цалкам адбыў свой тэрмін у адной з найгоршых турмаў Беларусі — івацэвіцкай калоніі „Воўчыя норы“. Эдуард выйшаў на волю толькі праз 4 гады, бо адмаўляўся пісаць прашэнне на памілаванне. Пасля 24 лютага 2022 былы палітвязень узяў у рукі зброю, каб абараняць Украіну ад расійскіх захопнікаў. На гэтай вайне гінуць беларусы, якія маглі б яшчэ доўга жыць і рабіць нашую краіну лепшай. Але злачынныя рэжымы вырашылі інакш. Мы не забудземся Эдуарда Лобава. Ён назаўсёды застанецца ў нашых сэрцах».
Нагадаем, 26 студзеня ў Кіеве прайшоў марш памяці загінулых за Украіну беларусаў. Яго ўдзельнікі неслі транспарант з прозвішчамі больш чым 30 чалавек, якія аддалі свае жыцці ў перыяд з 2014 да 2022 года.