Гомельскі валанцёр Ілля Міронаў накіраваў у Следчы камітэт заяву з просьбай распачаць крымінальную справу ў дачыненні да прапагандыста тэлеканала СТБ Рыгора Азаронка. Пра гэта паведамляе выданне «Штодзень».
У сваім лісце гамяльчук адзначыў, што 18 студзеня 2023 года на сайце тэлеканала СТБ апублікавалі артыкул з відэаролікам «Азаронак: крок насустрач тым, хто хоча вярнуцца — гэта сталінскі крок, гэта наймагутнейшая воля Лукашэнкі».
У гэтым відэасюжэце Азаронак, на думку Іллі Міронава, ажыццявіў дзеянні, «скіраваныя на распальванне нянавісці, варожасці, а таксама зняважыў гонар і годнасць групы людзей па прыкметах прыналежнасці да пэўнай сацыяльнай групы».
Ілля Міронаў запатрабаваў прыцягнуць Рыгора Азаронка да адказнасці па ч. 1 арт. 130 КК. Санкцыя артыкула прадугледжвае да пяці гадоў пазбаўлення волі.
Нагадаем, Ілля Міронаў вядомы сваёй ініцыятывай «Пішыце лісты», скіраванай на падтрымку палітвязняў. Сам ён напісаў больш за 2500 лістоў. Ініцыятыва была намінаваная на Нацыянальную прэмію за дасягненні ў галіне правоў чалавека ў 2021 годзе.
30 верасня 2021 года Міронаў быў затрыманы ў рамках «справы Зельцэра» за каментары ў інтэрнэце пасля гібелі айцішніка Андрэя Зельцэра і супрацоўніка КДБ Дзмітрыя Федасюка ў Мінску. Першапачаткова Іллі выставілі абвінавачанне па арт. 130 КК аб распальванні варожасці. Але падчас следства абвінавачанне не пацвердзілася, і артыкул замянілі на 369−1 КК «Дыскрэдытацыя Рэспублікі Беларусь».
Больш за год Міронаў правёў у СІЗА. 24 кастрычніка 2022-га яго асудзілі на 1,5 года пазбаўлення волі ў калоніі агульнага рэжыму, але вызвалілі ў зале суда, бо дзень у СІЗА прыраўноўваецца да 1,5 дня ў калоніі, і Ілля сваё пакаранне ўжо адбыў. Таксама яму прызначылі штраф у 6400 рублёў.