Тайланд можа спрасціць, а ў перспектыве і адмяніць атрыманне візаў беларусамі. Акрамя таго, у папулярную сярод турыстаў краіну збіраюцца адкрыць прамы авіярэйс з Мінска. Ужо ідуць перамовы па абодвух пытаннях, паведаміў парталу Tochka.by ганаровы консул Каралеўства Тайланд у Беларусі Іван Чура.
Дыпламат расказаў, што першым этапам спрашчэння выдачы тайландскіх візаў беларусам мусіць стаць іх афармленне ў аэрапорце па прылёце. А другім — поўная адмена візаў. Беларускае МЗС ужо адправіла ў МЗС Тайланда неабходную інфармацыю.
— Усё ў працэсе, пакуль падпісаных дакументаў няма, але наш бок разлічвае на станоўчае рашэнне па гэтым пытанні, — дадаў Чура.
Цяпер паміж Беларуссю і Тайландам дзейнічае візавы рэжым. Дакументы падаюцца ў ганаровым консульстве азіяцкай краіны ў Мінску, сама віза афармляецца пасольствам Тайланда ў Расіі.
Тэрмін атрымання турыстычнай аднаразовай візы (дзейнічае да 60 дзён з магчымасцю падаўжэння) — не менш за 18 каляндарных дзён з моманту адпраўкі дакументаў у пасольства Тайланда ў Маскве. Кошт — 40 даляраў плюс 70 рублёў.
Паводле Івана Чуры, штотыдзень праз тайландскае консульства ў Мінску візы атрымліваюць прыкладна 300 чалавек, то-бок 1200 за месяц. Сёння гэта адзін з самых папулярных у беларусаў кірункаў для адпачынку «па далёкай дузе» — па запатрабаванасці Тайланд апярэджвае Кубу, Індыю, Шры-Ланку і В’етнам.
Ідуць перамовы і пра тое, каб звязаць Беларусь і Тайланд прамым авіярэйсам. Першы можа адбыцца ўжо ў верасні наступнага года.
Пакуль не вырашана, будзе канчатковым пунктам маршруту Бангкок (сталіца Тайланда) ці Пхукет (папулярны астраўны курорт), як і тое, будзе гэта рэйс чартарным ці рэгулярным. Але, паводле Чуры, «намеры сур’ёзныя».
— Выконваць пералёты зможа тайская авіякампанія, якая мае для гэтага адпаведны флот далёкамагістральных самалётаў, — сказаў дыпламат.
Цяпер дабрацца з Беларусі ў Тайланд можна як мінімум з адной перасадкай — напрыклад, праз Маскву ці Пекін. Цана білета ў адзін бок у канцы студзеня стартуе ад 2500 рублёў без багажу.
Чытайце таксама
