Грамадзянін Беларусі Павел Юшкевіч, якому анулявалі дазвол на пастаяннае пражыванне ў Польшчы праз сакрэтнае заключэнне спецслужбаў, мусіў пакінуць краіну да 4 лютага — гэта апошні дзень легальнага знаходжання мужчыны ў Польшчы. Каб пазбегнуць дэпартацыі, Павел вырашыў падаць заяву на міжнародную абарону, пра гэта ён расказаў MOST.
— Сёння (6 лютага. — Заўв. рэд.) падаюся на міжнародную абарону, падалі скаргу ў суд. Пакуль разглядаецца справа пра абарону, я магу знаходзіцца ў Польшчы, таму спадзяюся, што ўсё вырашыцца на судзе і гэты кашмар скончыцца, — паведаміў Павел выданню.
Разам з хадайніцтвам пра міжнародную абарону Павел плануе падаць заяву на дазвол на працу. Ён выкладае ва ўніверсітэце Мікалая Каперніка ў Торуні і ўніверсітэце WSB Merito ў Быдгашчы. Раней у інтэрв'ю газеце Wyborcza Павел сказаў: «Мой працадаўца пытае, ці планаваць для мяне заняткі. А я паняцця не маю, што адказаць. Я хацеў бы працягваць працаваць і без нейкіх хваляванняў вярнуцца да заняткаў з маімі студэнтамі».
Грамадзянін Беларусі, этнічны паляк Павел Юшкевіч жыў у Польшчы з 17 гадоў. У студзені стала вядома, што праз сакрэтнае заключэнне Агенцтва ўнутранай бяспекі (ABW), выдадзенае больш за 10 гадоў таму, Паўла пазбавілі дазволу на пражыванне ў краіне. Але за яго заступіліся ваявода Куяўска-Паморскага ваяводства, акадэмічная грамадскасць і беларусы Польшчы.
Вяртацца ў Беларусь для Паўла рызыкоўна з прычыны актыўнай дзейнасці ў падтрымку дэмакратычнага руху.
Чытайце таксама
