Залева, якая накрыла Мінск 18 ліпеня, — імаверна, самая магутная за ўсю гісторыю метэаназіранняў, паведамляе тэлеграм-канал Nadvorie.
Паводле звестак Белгідрамета, сёння ў Мінску на метэастанцыі на праспекце Незалежнасці выпала 88 мм ападкаў, а на метэастанцыі Уручча — 51 мм.
Адзначаецца, што адзін міліметр пласта ападкаў роўны аднаму літру вады на квадратны метр паверхні, так што выглядае ўсё так, што гэта была сапраўды самая моцная залева за апошнія гады.
Да прыкладу, папярэдні рэкорд па ападках у беларускай сталіцы быў 8 жніўня 2005-га, тады выпала 77,5 мм.
Нагадаем, што ў першай палове дня 18 ліпеня на Мінск абрынулася залева. Некаторыя вуліцы затапіла, на шэрагу маршрутаў спыніўся грамадскі транспарт. Відэа наступстваў непагадзі з’явіліся ў сацсетках. На апублікаваных роліках — затопленыя ўчасткі вуліц Прытыцкага, Грыбаедава, мора ля ТРЦ Palazzo, велізарнае возера ў раёне парку Чалюскінцаў.
На вуліцы Якуба Коласа людзі амаль дзве гадзіны былі заблакаваныя ў трамваях, бо кіроўцы не маглі адкрыць дзверы, вуліцу затапіла.
Праз залеву ў горадзе ўтварыліся дзесяцібальныя заторы.
Сталічныя ўлады расказалі, што ліўневая каналізацыя Мінска спраўная і ачышчаная, аднак праз такую колькасць ападкаў прыняць іх адначасова не можа. Калі дождж сціхае, вада з вуліц горада сыходзіць.