У Міністэрстве абароны Расіі заявілі, што ў Данецкай вобласці нанеслі ўдар па камандным пункце 115-й механізаванай брыгады УСУ. Ва ўкраінскім Генштабе паведамілі, што УСУ працягваюць наступаць на поўдзень і поўнач ад Бахмута, замацоўваюцца на дасягнутых рубяжах. У амерыканскім Інстытуце па вывучэнні вайны расказалі, навошта Расія нагнятае сітуацыю вакол Запарожскай атамнай станцыі.
Расказваем пра галоўнае са зводак штабоў і высноваў экспертаў на 497-ы дзень вайны ва Украіне.
Генштаб УСУ: Вядзём наступальныя аперацыі на Мелітопальскім і Бярдзянскім напрамках
За мінулыя суткі Расія нанесла ракетны ўдар па горадзе Першамайскі і пасёлку Белы Калодзеж Харкаўскай вобласці. Акрамя таго, зафіксаваныя 47 авіяцыйных удараў і 59 абстрэлаў з рэактыўных сістэм залпавага агню па пазіцыях УСУ і населеных пунктах. Ёсць пацярпелыя сярод мірнага насельніцтва, пашкоджаныя жылыя дамы, гаспадарчыя і адміністрацыйныя будынкі, а таксама прыватны аўтамабільны транспарт. Пра гэта паведамляе Генштаб УСУ ў ранішняй зводцы.
— Расійская армія засяроджвае асноўныя намаганні на Ліманскім, Бахмуцкім, Аўдзееўскім і Мар'інскім напрамках — там працягваюцца цяжкія баі, за суткі адбылося 40 баявых сутыкненняў.
— На Северскім і Слабажанскім напрамках расіяне актывізавалі дыверсійна-разведвальную дзейнасць у памежных з Украінай раёнах. За мінулыя суткі з мінамётаў і артылерыі абстралялі больш за 15 населеных пунктаў Чарнігаўскай, Сумскай і Харкаўскай абласцей.
— На Купянскім напрамку расійскія войскі спрабавалі наступаць на поўдзень ад Навасёлаўскага Луганскай вобласці. З артылерыі і мінамётаў абстралялі сем населеных пунктаў Харкаўскай вобласці.
— На Ліманскім напрамку войска РФ пры падтрымцы авіяцыі спрабавала выцесніць УСУ з займаных пазіцый на захад ад Нававоднага і на поўдзень ад Дзібровы Луганскай вобласці, але поспеху не мела. Артылерыйскім абстрэлам праціўніка падвергліся больш за 10 населеных пунктаў Луганскай і Данецкай абласцей.
— На Бахмуцкім напрамку пад шчыльным агнём авіяцыі і артылерыі УСУ адбілі атакі расійскіх войскаў у раёнах населеных пунктаў Арэхава-Васілеўка і Багданаўка Данецкай вобласці. Разам з тым УСУ працягваюць весці наступальныя дзеянні на поўдзень і поўнач ад горада Бахмут, замацоўваюцца на дасягнутых рубяжах. Ад абстрэлаў расійскай артылерыі пацярпелі больш чым 15 населеных пунктаў Данецкай вобласці.
— На Аўдзееўскім напрамку УСУ працягваюць стрымліваць наступ расійскіх войскаў у раёне горада Аўдзееўка Данецкай вобласці. У той жа час праціўнік абстраляў з артылерыі больш за 10 населеных пунктаў Данецкай вобласці.
— На Мар'інскім напрамку УСУ адбілі ўсе атакі расійскіх войскаў у раёне горада Мар'інка. Расіяне абстралялі больш за 10 населеных пунктаў Данецкай вобласці.
— На Шахцёрскім напрамку расійская армія нанесла авіяцыйны ўдар у раёне Вуглядара Данецкай вобласці. Абстраляла больш за 15 населеных пунктаў Данецкай вобласці.
— На Запарожскім і Херсонскім напрамках расійскія войскі засяроджваюць асноўныя намаганні на недапушчэнні прасоўвання УСУ. Нанеслі авіяцыйны ўдар у раёне Раўнаполля Запарожскай вобласці. З артылерыі абстралялі больш за 30 населеных пунктаў Запарожскай, Херсонскай абласцей і горад Херсон.
У той жа час УСУ працягваюць весці наступальную аперацыю на Мелітопальскім і Бярдзянскім напрамках, замацоўваюцца на дасягнутых рубяжах, наносяць агнявое паражэнне з артылерыі па выяўленых цэлях праціўніка.
— Авіяцыя Сіл абароны за мінулыя суткі нанесла 13 удараў па раёнах канцэнтрацыі асабовага складу расійскіх войскаў, тры — па яго зенітна-ракетных комплексах і адзін — па пункце кіравання.
— Знішчаныя пяць разведвальных БПЛА аператыўна-тактычнага ўзроўню.
Падраздзяленні ракетных войскаў і артылерыі за суткі пабілі раён канцэнтрацыі жывой сілы, узбраення і ваеннай тэхнікі праціўніка, чатыры склады боепрыпасаў, 18 сродкаў артылерыі на агнявых пазіцыях, тры сродкі СПА і дзве станцыі радыёэлектроннай барацьбы расійскіх войскаў.
Мінабароны Расіі: Спынілі дзейнасць шасці ўкраінскіх ДРГ
«Цягам сутак Узброеныя сілы Украіны працягвалі спробы наступальных дзеянняў на Данецкім, Чырвона-Ліманскім, Паўднёва-Данецкім і Запарожскім напрамках», — заявілі ў Міністэрстве абароны Расіі.
— На Данецкім напрамку падраздзяленні Паўднёвай групоўкі войскаў за дзень адбілі дзевяць атак УСУ ў раёнах населеных пунктаў Белагораўка, Першамайскае, Паўночнае, Невельскае і Краснагораўка Данецкай вобласці. Акрамя таго, у раёне горада Арцёмаўск (Бахмут) нанесенае паражэнне тром канцэнтрацыям жывой сілы і тэхнікі УСУ.
— На Чырвона-Ліманскім напрамку падраздзяленні групоўкі войскаў «Цэнтр» пры падтрымцы авіяцыі, артылерыі і цяжкіх агнямётных сістэм адбілі дзве атакі штурмавых груп 63-й і 66-й механізаваных брыгад УСУ ў раёнах населеных пунктаў Макееўка і Чырвоная Дзіброва Луганскай вобласці. У раёнах населеных пунктаў Ямпалоўка, Тарскае, Грыгораўка Данецкай вобласці, Кузьміно і Чырвонапапоўка Луганскай вобласці нанесенае паражэнне жывой сіле і тэхніцы 21-й, 42-й, 63-й механізаваных і 95-й дэсантна-штурмавой брыгад УСУ. Акрамя таго, у раёнах населеных пунктаў Серабранка і Тарскае Данецкай вобласці спыненая дзейнасць дзвюх украінскіх дыверсійна-разведвальных груп.
— На Паўднёва-Данецкім напрамку падраздзяленні групоўкі войскаў «Усход» пры падтрымцы артылерыі і цяжкіх агнямётных сістэм адбілі пяць атак УСУ сіламі да мотапяхотнай роты ў напрамку населеных пунктаў Старамаёрскае і Ураджайнае Данецкай вобласці. У раёнах населеных пунктаў Макараўка Данецкай вобласці і Прыютнае Запарожскай вобласці пабітая жывая сіла УСУ. Таксама ў раёне населенага пункта Вуглядар Данецкай вобласці знішчаная ўкраінская дыверсійна-разведвальная група.
— На Запарожскім напрамку расійскія войскі адбілі атаку падраздзяленняў 128-й горна-штурмавой брыгады УСУ ў раёне населенага пункта Жарабянкі Запарожскай вобласці. У раёнах населеных пунктаў Праабражэнка і Малая Такмачка Запарожскай вобласці ўдарамі авіяцыі пабітыя жывая сіла і тэхніка УСУ. Акрамя таго, у раёнах населеных пунктаў Лугаўское, Марфаполь і Мірнае Запарожскай вобласці спыненая дзейнасць трох украінскіх дыверсійна-разведвальных груп.
— На Купянскім напрамку авіяцыяй, артылерыяй Заходняй групоўкі войскаў пабітыя жывая сіла і тэхніка падраздзяленняў 14-й механізаванай брыгады УСУ ў раёнах населеных пунктаў Навамлынск, Двурэчная, Сінькоўка і Цімкаўка Харкаўскай вобласці.
— На Херсонскім напрамку нанесеныя ўдары па канцэнтрацыі жывой сілы і тэхнікі УСУ.
Усяго за суткі, паводле МА РФ, нанесенае паражэнне 79 артылерыйскім падраздзяленням, жывой сіле і ваеннай тэхніцы УСУ ў 109 раёнах. Знішчаныя тры склады боепрыпасаў і ваенна-тэхнічнай маёмасці УСУ. У раёне населенага пункта Раздолаўка Данецкай вобласці нанесенае паражэнне каманднаму пункту 115-й механізаванай брыгады УСУ. Сродкамі СПА перахопленыя шэсць рэактыўных снарадаў сістэмы залпавага агню HIMARS. Знішчаныя шэсць беспілотных лётных апаратаў.
Інстытут па вывучэнні вайны: УСУ засяродзіліся на знясіленні расійскіх войскаў
Расійскія і ўкраінскія афіцыйныя асобы абвастрылі сваю рыторыку вакол сітуацыі на Запарожскай атамнай электрастанцыі, гаворыцца ў свежай справаздачы амерыканскага Інстытута па вывучэнні вайны. Эксперты адзначаюць, што Расія засяродзілася на абвінавачванні Украіны, імаверна, з мэтай стварэння ўмоваў для магчымага правядзення аперацыі «пад фальшывым сцягам». Аднак лічаць, што ў цяперашні час малаімаверна, што Расія зладзіць інцыдэнт на ЗАЭС. Аналітыкі кажуць, што рэактары ЗАЭС былі сканструяваныя такім чынам, каб вытрымліваць значныя пашкоджанні. Таму нават калі будуць узарваныя выбуховыя прылады, якія РФ, паводле паведамлення Генштаба УСУ, размясціла на дахах двух энергаблокаў, яны не пашкодзяць рэактар, а, хутчэй, створаць падманнае ўражанне, што ўкраінскія сілы абстралялі станцыю.
ISW раней ацэньваў, што такія правакацыйныя расійскія заявы і нават магчымасць дыверсіі на АЭС — імаверна, частка шырэйшай інфармацыйнай аперацыі Расіі, скіраванай на тое, каб абвінаваціць Украіну ў безадказнасці напярэдадні саміту NATO і прымусіць УСУ адмовіцца ад вядзення контрнаступальных аперацый у Запарожскай вобласці.
Што да контрнаступальных аперацый, то, як заўважаюць у Інстытуце, УСУ, відаць, сканцэнтраваліся на знясіленні расійскіх войскаў, імкнучыся мінімізаваць украінскія страты за кошт больш павольных тэмпаў тэрытарыяльных заваёваў. Так, сакратар Рады нацыянальнай бяспекі і абароны Украіны Аляксей Данілаў паведаміў 4 ліпеня, што ўкраінскія сілы выконваюць сваю асноўную задачу па знішчэнні расійскай жывой сілы, тэхнікі, складоў паліва, артылерыі і сродкаў СПА і што «вайна на знішчэнне роўная вайне на кіламетры». Кіраўнік ваеннага камітэта NATO адмірал Боб Баўэр паведаміў 3 ліпеня, што ўкраінскія сілы маюць рацыю, дзейнічаючы асцярожна і пазбягаючы вялікіх стратаў падчас контрнаступлення, і прызнаў, што контрнаступленне ўскладненае праз наземныя міны і іншыя перашкоды, збудаваныя расійскімі войскамі на акупаваных тэрыторыях.
Цяперашні павольны тэмп украінскіх аперацый не сведчыць пра тупіковую сітуацыю або пра тое, што Украіна не можа адбіць вялікія тэрыторыі, упэўненыя аналітыкі. Яны нагадваюць, што ў перыяд са жніўня да лістапада 2022 года ўкраінскія сілы праводзілі павольныя і паступовыя аперацыі па блакаванні раёнаў на левым і правым берагах Дняпра ў Херсонскай вобласці, перш чым УСУ здолелі прымусіць войска РФ канчаткова адысці. Таму хоць цяперашняе ўкраінскае контрнаступленне менш драматычнае і не такое хуткае, як тое, калі была вызваленая вялікая частка Харкаўскай вобласці, яно ў цэлым больш за ўсё падобнае па сваіх тэмпах і пачатковым прагрэсе да херсонскага.
— Украінскія войскі працягвалі контрнаступальныя дзеянні як мінімум на чатырох участках фронту і 4 ліпеня прасунуліся наперад.
— Расійскія войскі наносілі абмежаваныя наземныя ўдары на лініі Купянск — Сватава — Крамянная і на поўдзень ад Крамянной.
— Расійскія крыніцы сцвярджалі, што ўкраінскія сілы правялі абмежаваныя наземныя атакі ўздоўж лініі Купянск — Сватава — Крамянная.
— Расійскія і ўкраінскія войскі ўзмацнілі наземныя атакі ў раёне Бахмута.
— 4 ліпеня расійскія войскі працягвалі наземныя атакі ўздоўж лініі Аўдзееўка — Данецк.
— Расійскія і ўкраінскія войскі правялі наземныя атакі на захадзе Данецкай вобласці.
— Расійскія крыніцы сцвярджалі, што ўкраінскія сілы працягвалі контрнаступальныя аперацыі ў раёне Арэхава на захадзе Запарожскай вобласці.
На што яшчэ звярнулі ўвагу эксперты:
- расійскія ўлады, як паведамляецца, вярнулі Прыгожыну канфіскаваныя ў яго падчас ператрусаў актывы, магчыма, у рамках угоды, заключанай паміж Пуціным, Прыгожыным і Лукашэнкам;
- паведамляецца, што Расія фармуе новую агульнавайсковую армію ў складзе Паўночнага флоту, імаверна, каб прадэманстраваць сваю гатоўнасць супрацьстаяць NATO;
- расійскія ўлады працягваюць дэпартаваць украінскіх дзяцей у Расію пад выглядам аказання педыятрычнай дапамогі.