Калі ЗША вырашаць скараціць ваенную дапамогу, Украіна прайграе. Пра гэта заявіў прэзідэнт Украіны Уладзімір Зяленскі ў інтэрв'ю амерыканскаму тэлеканалу Fox News.
Падчас гутаркі журналіст звярнуўся да ўкраінскага лідара з удакладняльным пытаннем наконт яго нядаўніх заяваў. Гаворка ідзе пра інтэрв'ю Зяленскага Украінскаму радыё, дзе ён сказаў, што ў перамовах з ЗША, з Трампам і з Байдэнам украінцы даказалі, што з імі рыторыка «сядай і слухай» не працуе.
Журналіст Fox News удакладніў у Зяленскага, што будзе ў выпадку, калі ўрад ЗША скароціць ваенную дапамогу Украіне.
— Калі скароцяць, я думаю, што мы прайграем. Вядома, у любым выпадку мы застанемся, будзем ваяваць. У нас ёсць уласная вытворчасць, але яе недастаткова, каб перамагчы. І я думаю, што гэтага недастаткова, каб выжыць, — адказаў прэзідэнт Украіны.
На пытанне пра тое, ці зможа абраны прэзідэнт ЗША Дональд Трамп «паўплываць на Пуціна, каб пакласці канец вайне», Зяленскі адказаў:
— Гэта будзе няпроста, але я думаю, калі выкарыстоўваць усе тыя пытанні, якія ёсць у ЗША, то так, ён зможа. Бо ён нашмат мацнейшы за Пуціна. Ён мацнейшы. ЗША мацнейшыя. Эканоміка мацнейшая. У ЗША вельмі вялікі ўплыў.